सभागृह गाजणार ! विरोधी पक्षनेतेपदाची माळ भाऊसाहेब भोईर यांच्या गळ्यात
सत्ताधारी भाजपला घेरणार की समन्वयाचे राजकारण करणार ? शहराच्या राजकीय वर्तुळात चर्चांना उधाण
पिंपरी-चिंचवड | विशेष प्रतिनिधी – पिंपरी-चिंचवड महानगरपालिकेच्या राजकारणात सध्या ‘भाऊसाहेब भोईर’ या नावाभोवती मोठी चर्चा रंगली आहे. प्रदीर्घ अनुभव, प्रशासकीय कामाचा व्यासंग आणि सांस्कृतिक क्षेत्रातील दांडगा संपर्क असलेल्या भाऊसाहेब भोईर यांची राष्ट्रवादी काँग्रेस पक्षाच्या विरोधी पक्ष नेते पदी निवड जाहीर करण्यात आले आहे
अनुभवाचा कस लागणार पिंपरी-चिंचवड मध्ये सत्ताधारी भारतीय जनता पक्षाचे (BJP) स्पष्ट बहुमत असताना, विरोधकांची ताकद एकत्र बांधण्याचे मोठे आव्हान भोईर यांच्यासमोर असणार आहे. राष्ट्रवादी काँग्रेस (अजित पवार गट) भोईर यांच्या नावावर शिक्कामोर्तब करून हे स्पष्ट केले आहे की, सभागृहात केवळ संख्याबळ असून चालत नाही, तर अभ्यासू आणि नियमांची जाण असलेला नेता हवा.
सत्ताधाऱ्यांसाठी ‘कठीण’ काळ ? भाऊसाहेब भोईर यांनी विविध महत्त्वाच्या समित्यांचे पद भूषवले असून महापालिकेची कार्यपद्धती आणि ‘फाईल’ कोठे अडकते, हे त्यांना चांगलेच ठाऊक आहे. त्यामुळे आगामी काळात निविदा प्रक्रिया, विकासकामांचा दर्जा आणि शहरातील वाढता पाणीप्रश्न यांवरून ते सत्ताधारी भाजपला कोंडीत पकडण्याची शक्यता आहे.
जनसामान्यांचा आवाज : केवळ राजकारण न करता शहरातील सांस्कृतिक आणि सामाजिक प्रश्नांवर त्यांनी नेहमीच भूमिका घेतली आहे. आता विरोधी पक्षनेते म्हणून त्यांना पद मिळाले आहे.
प्रशासनावर वचक : महापालिका अधिकाऱ्यांकडून कामे करून घेण्यात भोईर यांचा हातखंडा आहे, त्यामुळे सुस्त झालेल्या प्रशासनाला आता गती येईल अशी अपेक्षा व्यक्त होत आहे.
पिंपरी चिंचवड महानगरपालिकेच्या गटनेतेपदी माझी निवड झाली आहे. या जबाबदारीबद्दल आपल्या शुभेच्छा आणि प्रेम माझ्यासोबत आहेच. ही निवड म्हणजे केवळ एक पद किंवा जबाबदारी नसून हा एक लढा आहे, जो आपल्याला आदरणीय अजितदादांच्या विचाराने आणि सुनेत्रावहिनी यांच्या खंबीर नेतृत्वात पुढे न्यायचा आहे. परंतु, दुर्दैवाने महाराष्ट्राचे लाडके नेते आदरणीय अजितदादा पवार यांचे नुकतेच दुःखद निधन झाले आहे. सध्या संपूर्ण राज्य शोकसागरात बुडालेले असून, आपण सर्वजण या दुःखात सहभागी आहोत. या शोकपूर्ण वातावरणामुळे, मला शुभेच्छा देण्यासाठी येताना कृपया पुष्पगुच्छ, हार किंवा कोणतीही भेटवस्तू आणू नये, ही नम्र विनंती. आपले सहकार्य आणि भावना हीच माझ्यासाठी सर्वात मोठी शुभेच्छा आहेअसे मत भाऊसाहेब भोईर यांनी व्यक्त केले