पिंपरी चिंचवड – संपादक – शाम सोनवणे
भारतीय संस्कृती, वारकरी संप्रदाय आणि संत साहित्याचा वारसा जोपासण्यासाठी ‘जगद्गुरू संत तुकाराम महाराज संतपीठ’ आणि ‘अखिल भारतीय गांधर्व महाविद्यालय महामंडळ’ यांच्या संयुक्त विद्यमाने “गांधर्व मंच” या आंतरराष्ट्रीय संगीत स्पर्धेचे आयोजन करण्यात आले आहे. या भव्य उपक्रमाची माहिती देण्यासाठी आयोजित बैठकीत नवीन नियमावली आणि वेळापत्रक जाहीर करण्यात आले.
प्रमुख उपस्थिती व मार्गदर्शन :-
याप्रसंगी पिंपरी-चिंचवड महानगरपालिकेचे आयुक्त डॉ. विजय सूर्यवंशी यांच्या मार्गदर्शनाखाली नियोजनाची चर्चा झाली. यावेळी संतपीठाचे मुख्य कार्यकारी अधिकारी (CEO) संदीप खोत, संतपीठाच्या संचालिका डॉ. स्वाती मुळे, राजू ढोरे, गांधर्व महाविद्यालयाचे रजिस्टर विश्वास जाधव, प्राचार्य ज्ञानेश्वर किसन गाडगे आणि मार्केटिंग हेड पवन चौधरी उपस्थित होते.
स्पर्धेचे वैशिष्ट्य :-
संत ज्ञानेश्वर महाराजांचा ७५० वा जन्मोत्सव, जगद्गुरू संत तुकाराम महाराजांचा ३७५ वा वैकुंठगमन सोहळा आणि गांधर्व महाविद्यालय महामंडळाचे १२५ वे वर्ष या ऐतिहासिक योगायोगा निमित्त ही स्पर्धा होत आहे.
स्पर्धेचे प्रकार :-
शास्त्रीय गायन
संत रचित अभंग गायन
तबला सोलो
पखवाज सोलो
महत्वाच्या तारखा आणि नोंदणी
स्पर्धेसाठी ९ ते ४० वयोगटातील कलाकार सहभागी होऊ शकतात. पहिल्या टप्प्यात ऑनलाईन ऑडिशन होतील आणि त्यातून निवडलेल्या स्पर्धकांची अंतिम फेरी प्रत्यक्ष ‘संतपीठ’ येथे होईल.
नोंदणी कालावधी: २ एप्रिल ते २२ एप्रिल २०२६.
ऑनलाईन ऑडिशन तपासणी: ३० एप्रिल ते १० मे २०२६.
अंतिम फेऱ्या (Offline): ५ ते ७ जून २०२६ (संतपीठ परिसर).
बक्षीस वितरण: ७ जून २०२६ (राम कृष्ण मोरे प्रेक्षागृह).
भरघोस बक्षिसे
विविध वयोगटांनुसार प्रथम क्रमांकासाठी ₹ २५,००० ते ₹ ५०,००० पर्यंतची रोख बक्षिसे देण्यात येणार आहेत. याशिवाय द्वितीय, तृतीय आणि चतुर्थ क्रमांकासाठीही आकर्षक रकमेची बक्षिसे निश्चित करण्यात आली आहेत.
नोंदणीसाठी लिंक: > इच्छुक स्पर्धकांनी www.gandharvamancha.com या अधिकृत संकेतस्थळावर जाऊन आपले अर्ज सादर करावेत. २२ एप्रिलनंतर नोंदणी करणाऱ्यांसाठी विलंब शुल्क (Fine) लागू असेल.