पिंपरी | प्रतिनिधी – शाम सोनवणे
महाराष्ट्र राज्याचे दिवंगत माजी उपमुख्यमंत्री मा. श्री. अजितदादा पवार यांच्या अस्थि कलशाचे दर्शन मंगळवार, दि. ३ फेब्रुवारी २०२६ रोजी पिंपरी येथे आयोजित करण्यात आले आहे. राष्ट्रवादी काँग्रेस पार्टी पिंपरी-चिंचवड शहर (जिल्हा) च्या वतीने हा कार्यक्रम होणार असल्याची माहिती शहराध्यक्ष योगेश बहल यांनी दिली आहे.
दर्शनाचे स्थळ आणि वेळ
अजितदादांच्या स्मृतींना अभिवादन करण्यासाठी त्यांचे अस्थि कलश मुंबई-पुणे हायवेवरील पिंपरी येथील विश्वरत्न डॉ. बाबासाहेब आंबेडकर स्मारक प्रांगणात ठेवण्यात येणार आहेत. दर्शनाची वेळ सकाळी ११:०० ते दुपारी ३:०० वाजेपर्यंत निश्चित करण्यात आली आहे.
नेत्यांची व कार्यकर्त्यांची उपस्थिती
या प्रसंगी आजी-माजी खासदार, आमदार, नगरसेवक, पक्षाचे विविध सेलचे पदाधिकारी, कार्यकर्ते आणि मोठ्या संख्येने नागरिक उपस्थित राहणार आहेत. पिंपरी-चिंचवड शहराच्या विकासात दादांचे मोठे योगदान असल्याने या सोहळ्यासाठी शहराच्या कानाकोपऱ्यातून अनुयायी येण्याची शक्यता वर्तवण्यात येत आहे.
देहू येथे अस्थि विसर्जन
पिंपरी येथील दर्शन सोहळा आटोपल्यानंतर सायंकाळी या अस्थिंचे देहू येथील पवित्र इंद्रायणी नदीच्या पात्रात विसर्जन करण्यात येणार आहे.
शहराध्यक्ष योगेश बहल यांनी आवाहन केले आहे की, सर्व कार्यकर्ते आणि नागरिकांनी शिस्तबद्ध पद्धतीने उपस्थित राहून आपल्या लाडक्या नेत्याला श्रद्धांजली अर्पण करावी.
