पुणे जिल्ह्यात पटकावला प्रथम क्रमांक | १० पैकी ९.२ गुणांसह सलग दुसऱ्या वर्षी उत्कृष्ट कामगिरीची परंपरा कायम
जनता टाइम्स, पिंपरी – शाम सोनवणे –
दि. १२ जून २०२६
केंद्र शासनाच्या कौशल्य विकास व उद्योजकता मंत्रालयांतर्गत प्रशिक्षण महासंचालनालयाने (DGT) जाहीर केलेल्या देशभरातील औद्योगिक प्रशिक्षण संस्थांच्या (ITI) अंतिम श्रेणीकरणात (ग्रेडिंग) पिंपरी चिंचवड महानगरपालिकेच्या मोरवाडी येथील औद्योगिक प्रशिक्षण संस्थेने (आयटीआय) घवघवीत यश संपादन केले आहे. उत्कृष्ट कामगिरीची परंपरा कायम राखत मोरवाडी आयटीआयने देशात ७ वा, तर महाराष्ट्र राज्यात ५ वा क्रमांक पटकावून शहराच्या शिरपेचात मानाचा तुरा रोवला आहे.प्रशिक्षण महासंचालनालयाने आयटीआयद्वारे प्रदान केल्या जाणाऱ्या प्रशिक्षणाची गुणवत्ता, शैक्षणिक कामगिरी, प्रशिक्षण सुविधा, रोजगाराभिमुखता, संस्थात्मक व्यवस्थापन आणि विविध कार्यक्षमतेच्या निकषांच्या आधारे डेटा चलित ग्रेडिंग पद्धती लागू केली आहे. या पद्धतीनुसार शैक्षणिक वर्ष २०२६-२७ साठी ‘डीजीटी एमआयएस’ पोर्टलवरील माहितीच्या आधारे देशातील सर्व आयटीआयचे मूल्यमापन करण्यात आले.
या अत्यंत कडक आणि पारदर्शक ग्रेडिंगमध्ये मोरवाडी आयटीआयने १० पैकी ९.२ गुण प्राप्त करून देशपातळीवर ७ वा क्रमांक मिळवला आहे. तसेच पुणे विभागात २ रा क्रमांक आणि पुणे जिल्ह्यात प्रथम क्रमांक मिळविण्याचा मान पटकावला आहे. विशेष म्हणजे, संस्थेने सलग दुसऱ्या वर्षी अशी उल्लेखनीय कामगिरी नोंदवून आपल्या गुणवत्तापूर्ण प्रशिक्षण व्यवस्थेची आणि विद्यार्थीकेंद्रित उपक्रमांची प्रभावी छाप उमटविली आहे.सध्या पिंपरी चिंचवड महानगरपालिकेचे महापौर रवि लांडगे आणि आयुक्त डॉ. विजय सूर्यवंशी यांच्या मार्गदर्शनाखाली तसेच अतिरिक्त आयुक्त कुलदीप जंगम यांच्या नियंत्रणाखाली या संस्थेचे कामकाज प्रभावीपणे सुरू आहे.
अथक परिश्रमांचे फलित!
“मोरवाडी आयटीआयने राष्ट्रीय आणि राज्यस्तरावर मिळविलेले हे यश शहराच्या शैक्षणिक व कौशल्य विकास क्षेत्रातील प्रगतीचे द्योतक आहे. देशात ७ वा आणि राज्यात ५ वा क्रमांक मिळविणे ही अत्यंत अभिमानास्पद बाब असून संस्थेतील अधिकारी, कर्मचारी, प्रशिक्षक आणि विद्यार्थ्यांच्या अथक परिश्रमांचे हे फलित आहे.”— रवि लांडगे, महापौर,
पिंपरी चिंचवड महानगरपालिकामहानगरपालिका गुणवत्तेसाठी कटिबद्ध!
“मोरवाडी आयटीआयने राष्ट्रीय स्तरावर मिळविलेला हा मान पिंपरी चिंचवड शहरासाठी अभिमानास्पद आहे. सलग दुसऱ्या वर्षी उत्कृष्ट ग्रेडिंग प्राप्त करणे ही संस्थेच्या समर्पित कार्याची पावती आहे. विद्यार्थ्यांना उद्योगाभिमुख व रोजगारक्षम कौशल्ये उपलब्ध करून देण्यासाठी महापालिका भविष्यातही संस्थेची गुणवत्ता अधिक उंचावण्यासाठी कटिबद्ध आहे.”— डॉ. विजय सूर्यवंशी, आयुक्त, पिंपरी चिंचवड
महानगरपालिकाया यशाबद्दल बोलताना मोरवाडी आयटीआयचे प्राचार्य तथा विभागप्रमुख शशिकांत पाटील यांनी सांगितले की, “या यशामध्ये संस्थेतील सर्व अधिकारी, कर्मचारी, प्रशिक्षक तसेच विद्यार्थ्यांचे योगदान महत्त्वपूर्ण ठरले आहे. या उल्लेखनीय यशामुळे संस्थेची शैक्षणिक गुणवत्ता, प्रशिक्षणाची उत्कृष्टता आणि उद्योगाभिमुख कौशल्य विकास क्षेत्रातील विश्वासार्हता पुन्हा अधोरेखित झाली असून भविष्यातही अधिक उंची गाठण्याचा संस्थेचा संकल्प अधिक उंची गाठण्याचा संस्थेचा संकल्प आहे.”
(जनता टाइम्स): औद्योगिक पंढरी म्हणून ओळखल्या जाणाऱ्या पिंपरी-चिंचवडमधील तरुणांना स्थानिक पातळीवरच जागतिक दर्जाचे कौशल्यपूर्ण शिक्षण देण्याचे काम मोरवाडी आयटीआय करत आहे, हे या ग्रेडिंगवरून स्पष्ट होते. या यशाबद्दल ‘जनता टाइम्स’ समूहाकडून संस्थेचे मनःपूर्वक अभिनंदन!