पिंपरी, दि. १२ जून (प्रतिनिधी): शाम सोनवणे
पिंपरी चिंचवड महानगरपालिकेच्या शिक्षण मंडळामध्ये सुरू असलेला भ्रष्टाचार आणि ढिसाळ कारभार तात्काळ थांबवावा, तसेच पवना व इंद्रायणी नदीचे प्रदूषण करणाऱ्या कंपन्यांवर कडक कायदेशीर कारवाई करावी, अशी मागणी शिवसेना (उद्धव बाळासाहेब ठाकरे) पक्षाचे पिंपरी-चिंचवड शहराध्यक्ष चेतन पवार यांनी केली आहे. महापालिकेच्या मनमानी कारभाराविरोधात शिवसेना पक्षाच्या वतीने तीव्र आंदोलन छेडण्यात येईल, असा इशाराही त्यांनी आज पिंपरी येथे आयोजित पत्रकार परिषदेत दिला.
पुनावळे येथील पालिकेच्या शाळेचे आरक्षण खाजगी संस्थेला देण्यास विरोध
पत्रकार परिषदेत माहिती देताना चेतन पवार म्हणाले की, “गाव मौजे पुनावळे येथील सर्वे नं. ३८ आणि ४४ पैकी ३१ आर मिळकतीवर पिंपरी चिंचवड महानगरपालिकेच्या शाळेचे आरक्षण (क्रमांक ४/५७) आहे. हे आरक्षण पालिकेने स्वतः विकसित करून तिथे उत्तम दर्जाची शाळा सुरू करणे आवश्यक आहे. यामुळे स्थानिक गोरगरीब कुटुंबातील मुलांना मोफत व दर्जेदार शिक्षण मिळेल, तसेच महापालिकेला डोनेशन व वार्षिक फीच्या माध्यमातून महसूल मिळून स्थानिक तरुण-तरुणींना रोजगाराच्या संधी उपलब्ध होतील.”
परंतु, महापालिका हे आरक्षण स्वतः विकसित न करता ‘आदित्य एज्युकेशन कॅम्पस, रामनगर बोरीवली’ या खाजगी संस्थेला भाडेतत्त्वावर देण्याचा प्रयत्न करत आहे, असा गंभीर आरोप पवार यांनी केला. या जागेचे भाडे प्रति चौरस फूट अवघे ३ रुपये ६० पैसे म्हणजेच प्रति महिना फक्त ३ लाख १३ हजार ३३१ रुपये इतके अत्यंत कमी व संशयास्पद ठरवण्यात आले आहे. हा दर नक्की कोणत्या आधारे ठरवला, हे प्रशासनाने स्पष्ट करावे आणि ही निविदा रद्द करून पालिकेने स्वतः शाळा विकसित करावी, अशी मागणी त्यांनी केली.
नद्यांची दुरवस्था आणि प्रदूषण शहराला पाणीपुरवठा करणाऱ्या पवना व इंद्रायणी नदीची सद्यस्थिती अत्यंत दयनीय झाली आहे. काही ठिकाणी राडारोडा टाकून नदीपात्र लहान करण्याचे काम सुरू असून, थेट पाईपलाईनद्वारे घाणेरडे पाणी नदीपात्रात सोडले जात आहे. रावेत हायवेजवळील पुलाखाली अनेक लोक जुगार खेळत असून नदीत कचरा टाकून प्रदूषण करत आहेत, याकडे प्रशासनाचे पूर्णपणे दुर्लक्ष होत असल्याचे सांगत पवार यांनी यासंबंधीचे फोटोच पुरावे म्हणून सादर केले.
नियमबाह्य ठराव आणि निविदांमध्ये गैरव्यवहार स्थायी समितीमार्फत २२ एप्रिल २०२६ रोजी मंजूर करण्यात आलेल्या ठराव क्रमांक ३६६ बाबतही त्यांनी प्रश्न उपस्थित केले. “हा वर्क ऑर्डरचा ठराव ‘जगदंब महिला रेडीमेड ड्रेसेस, सोलापूर’ यांच्या नावे मंजूर असताना, प्रत्यक्षात ही ऑर्डर बिल्डर पद्माचंद जैन यांना देण्यात आली आहे. या ठरावाची कोणतीही ई-निविदा (e-tender) काढण्यात आली नव्हती, तसेच ठरावावर रक्कमेचा देखील उल्लेख नव्हता. मग हा नियमबाह्य ठराव कोणाच्या सांगण्यावरून पास झाला?” अशी विचारणा करत या प्रकरणाची चौकशी करून दोषींवर कारवाई करण्याची मागणी त्यांनी केली. तसेच, ताथवडे येथील जिल्हा परिषदेची शाळा २०१३ मध्येच मनपाकडे वर्ग करण्याचा शासन आदेश असतानाही, अद्याप ती वर्ग न करून घेता शिक्षण मंडळात मनमानी कारभार सुरू असल्याचा आरोप त्यांनी केला.
या पत्रकार परिषदेला शिवसेना (उद्धव बाळासाहेब ठाकरे) पक्षाचे स्थानिक पदाधिकारी आणि कार्यकर्ते मोठ्या संख्येने उपस्थित होते. पालिकेने या मागण्यांची दखल न घेतल्यास शहरात तीव्र आंदोलन उभे केले जाईल, असा इशारा शेवटी चेतन पवार यांनी दिला.
